МАНСАП

Атак, мансап,
Кайда бассак
Келе бербес таалайга.
Жолу саздак,
Тайгак, таштак
Турак жайы далайда.
Калыс жанга
Аман барда
Конуп кетер бир ирет.
Өңү жылуу
Кийми сулуу
Ким экенин ким билет.
Сылап-сыйпап,
Сынап-сыйлап,
Жедирет да, ичирет.
Чыкпай пайдаң,
Куруп сайран
Сен чоңойсоң кичирет.
Калкка жаккан
Катуу аккан
Дайрасы бар жол коёт.
Андан өтсөң,
Күч көрсөтсөң,
Кичирсең да чоңоёт.
9/ХII 1945
Койсары
Ырас болду, бактым, келгениң,
Кубанды менин элдерим.
Жаныма батты аябай,
Кайыры жок шофёрдой,
Кайкалап өтө бергениң.
9/XII 1945
Койсары