ШААРЫМА

Шаарым сенсиң, туулуп-өскөн Фрунзам,
Мени менен бир чоңойду далай там.
Бала кезде чырпык болгон талдарың,
Чынар болду ары кетип булуттан.
Баары эсимде ойноп-күлүп жүргөнүм,
Бала кезде күнөө кылган күндөрүм.
Жарым менен жарыштыра чуркатып,
Жаз алдында жамгыр жааган күндөрүң.
Баары эсимде, жибек көйнөк кыздарың,
Таалими бар, кичи пейил жаштарың.
Күз болгондо арзан айлык тиккендей
Дарбыз, коон, жүзүмү бар базарың.
4/ХI 1946
Чолпон-Ата